HENNAR RÖDD

SÖGUR KVENNA AF ERLENDUM UPPRUNA Á ÍSLANDI

Bókin Hennar rödd: Sögur kvenna af erlendum uppruna á Íslandi heiðrar framlag kvenna af erlendum uppruna til íslensks samfélags auk þess fær hún lesendur til þess að skilja betur stöðu kvenna af erlendum uppruna, sem mæta tvöfaldri mismunun vegna kyns og stöðu sinnar sem innflytjendur.

Bókin er gefin út af Vía útgáfu og er væntanleg 2022.

Forsala á bókinni er hafin!

Með því að kaupa bókina á forsölunni styður þú bæði við útgáfuna og tryggir þér bókina á kjarakaupum.

Forpantaðu núna!

Um okkur

Hennar rödd eru félagasamtök sem starfa með það að markmiði að auka vitund meðal almennings á stöðu kvenna af erlendum uppruna í íslensku samfélagi.

Tilgangur félagsins er að stuðla að vitundarvakningu og fræðslu um málefni kvenna af erlendum uppruna á Íslandi, þar með talið áskoranirnar sem þessi hópur mætir ásamt framlagi þeirra til samfélagsins. Markmið félagsins er að auka skilning og meðvitund í garð kvenna af erlendum uppruna í íslensku samfélagi.

Félagið heldur viðburði líkt og pallborðsumræður og ráðstefnur ásamt því að taka þátt í öðrum verkefnum þar sem markmiðið er að skapa vettvang til að raddir kvenna af erlendum uppruna fái að heyrast í samfélaginu.

Viðburðir hafa verið haldnir árlega frá stofnun félagsins árið 2018.

Leggðu málefninu lið með því að gerast félagi.

Raddir kvenna af erlendum uppruna á Íslandi þarfnast aukins hljómgrunns í samfélaginu. Skráðu þig sem félaga hjá Hennar rödd til að stuðla að því að fjölbreyttari raddir kvenna fái að heyrast.

Félagar í Hennar rödd fá sent reglulegt fréttabréf með fræðsluefni, fréttum, nýjustu rannsóknum, pistlum, viðtölum og öðru efni. Auk þess verða viðburðir og starf félagsins auglýst sérstaklega fyrir félagsmönnum.

Skráning í félagið

Félagsgjöld starfsárið 2021-2022 eru 1500 kr. Greiðsluseðill verður sendur í heimabanka.

Frjáls framlög
Rkn. 0133-26-000737
Kt. 460820-1110

Málefnið

Konur af erlendum uppruna er sívaxandi hópur á Íslandi sem hefur ekki verið veittur nægur hljómgrunnur í samfélaginu. Mikill fjölbreytileiki ríkir innan hópsins en þrátt fyrir það eru margar sameiginlegar hindranir til staðar. Þær skipa stóran en ósýnilegan sess í íslensku samfélagi og því er mikilvægt að leita leiða til þess að raddir þeirra heyrist.

Tungumál

Íslenskukunnátta er ein helsta hindrunin þegar kemur að þátttöku í samfélaginu. Tungumálakennsla er ekki nægilega aðgengileg fyrir konur af erlendum uppruna. Námskeiðin geta verið á óhentugum tíma fyrir konur vegna vinnu og umsjá barna.

Kynbundið ofbeldi

Hlutfallslega eru fleiri konur af erlendum uppruna sem dvelja hjá Kvennaathvarfinu vegna heimilisofbeldis og dvelja þar í lengri tíma en innlendar konur sem má rekja til skorts á tengslaneti og baklandi hér á landi. Konur af erlendum uppruna teljast jafnframt vera meirihluti þolenda mansals á Íslandi.

Atvinna

Atvinnuleysi er hærra meðal kvenna af erlendum uppruna en meðal innlendra kvenna. Einnig eru konur af erlendum uppruna líklegri en innlendar konur til að vera ofmenntaðar fyrir störfin sem þær sinna.

Heilsa

Skortur á menningarnæmni er viðvarandi vandamál sem konur af erlendum uppruna upplifa innan heilbrigðiskerfisins. Rannsóknir sýna að hindranir líkt og túlkaþjónusta og upplýsingagjöf er ábótavant, sem getur staðið í vegi fyrir því að þær fái fullnægjandi heilbrigðisþjónustu.

Stofnendur

Stofnendur félagasamtakanna Hennar rödd eru Chanel Björk Sturludóttir og Elínborg Kolbeinsdóttir.

Innblástur verkefnisins kom frá Letetia B. Jonsson, móður Chanel, en hún er af jamaískum og breskum uppruna og bjó hér á landi fyrir um það bil 10 árum síðan. Letetia tók virkan þátt í samfélagi kvenna af erlendum uppruna á Íslandi og kynntist mörgum frambærilegum konum sem upplifðu sömu hindranir og hún hvað varðar aðlögun að menningu og tungumáli landsins.

Sem dóttir Letetia upplifði Chanel ýmsar hindranir sem standa í vegi fyrir konum af erlendum uppruna í gegnum móður sína. Þessir erfiðleikar lituðu reynsluheim Chanel sem blandaður Íslendingur og hvatti hana til þess að takast á við þennan málaflokk. Eftir samræður við vinkonu sína, Elínborgu Kolbeinsdóttur, sem er menntuð í félagsfræði og mannréttindum, ákváðu þær að sameina krafta sína og stofna samtök með því að markmiði að vekja athygli á stöðu kvenna af erlendum uppruna í íslensku samfélagi.

Sjá nánar